Johana 3:16
Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan. Pathian hian khawvel hi a hmangaih kan tih rual hian, mihringte thinlungah hian LAL ber hi a duh a a thu hi a hmangaih zawk em em a ni.

THU AWIH LO NUN:-
Pathianin Adama hnenah....."a chhia leh a tha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni," tiin thu a pe a. (Genesis 2:17)
Adama kha a rinawm dawn nge dawn lo fiah a duh ani ngei ang...Genesis 2:9 ah chuan ti hian kan hmu leh a,....."Tin, lei atangin LALPA Pathianin thing mit la tak leh ei mi tinrêng a totîr a; nunna thing pawh huan lai takah chuan a totîr bawk a, a chhia leh tha hriatna thing pawh." tiin. Pathian khan Eden huanah khan thei ei tur chi hrang hrang a dah a, mahse huan lai taka thing kha chu ei a rem ti lo ei chuan thihna a ni tih Adama a hrilh thlap a ni.

Adama chu a in sum zo ta lo a, a chhia leh ṭha hriatna thei chu a ei ta, an lo fing ta a, saruak an ni tih an in hre ta, Pathian nena len dun chu an lo zak ta a, “Adam khawnge i awm” tiin koh a lo ngai ta a, Adama khan a thiam thu sawiin “awmpui tur i mi pek khan min pe a ka ei ta a lawm male”...chuti khati..han ti mahse Pathian chu a thuah a ding tlat a ni. Pathian chuan Nunna thing rah an ei ang a, kum khuain an nung ang tih a hlau a, Eden huan aṭang chuan a hnawt chhuak ta a ni. Thuawih loh chu avan pawi em!!

I Samuela 15: 1-3 -ah chuan Pathianin Samuela hmanga lal Saula hnena Amalek ho te bei a, va hneha an thil neih zawng zawng zuah lova ti boral vek a, a hmei a pa leh nausen te, hnute hne lai te leh an ran te pawh ti hlum vek tura a tih thu kan hmu. Pathian tirh ang ngei chuan Saula chuan Amalek ho chu ava hneh a, mahse Pathian thu pek ang loin ama duh dan leh finna hmangin, an ran vulh zinga a ṭha ṭha te chu inthawi nan hawnin Amalek ho lal Agaga chu a man bawk a, LALPA kha alawm dawn emaw a ti a mahse LALPA a lawm miah lo mai, LALPA hian a thu hi a hmangaih ber zel alo ni.

Kan tunlai hun han thlir hian, Saula nun ang deuh a, Pathian tirh ang nilova, mahni duh dana rawngbawl hi kan tam awm a sin, kan hriatreng atan a ṭha chu "inthawina aiin thuawih hi a ṭha zawk a ni" tih hi a ni. Pathian/Kohhran thu awih si lo va mahni ṭha tih dana awm hi Pathian huat zawng tak a nih kan ring em? Inthawina hi ṭha viau mahse Thu awihna tel lo inthawina chu Lalpan a pawm lo a ni ang, lal saula meuh pawh lal a nihna chu paihthlak anih phah ta a ni.

Numbers 20:24-28 kan chhiar chuan Arona’n Lalpa thu ang lova thil a tih avanga a thih thu kan hmu....Arona chu a chipuite hnenah hruai a ni ang; Meriba tuiahte khan ka thu dodala in hel avang khan Israel thlahte ka pêk ramah chuan a lut dawn lo a ni. .........Tichuan Mosia chuan Arona chu a silhfente a hlihsak a, Eleazara a bel a: tin, Arona chu tlâng chhipah chuan a thi ta a... tih thu kan hmu.

Thuthlunghlui huna Pathian mi hman tam tak, mahse an hun kal zela, Lalpa thu an zawm loh avanga Lalpan a tih hlum thu te hian min ti harh mawlh teh se. Pathian thu awih nia kan in hriat lai hian Kohhran thu hi kan awih em?

Matthaia 25:28, 30 Tichuan, a talent khat kha laksak ula, talent sawm neitu hnenah pe rawh u. ........Tin, bawi ṭhahnem lo kha pawn lamah thimah chuan paih chhuak rawh u; chutah chuan tah leh ha thial chu a awm ang,’ a ti a, a chhang a. Pathian hian kan theih ang tawk zea4l a rawngbawl a, kan thlarau nun ti hausa deuh deuh turin min beisei a, kan talent dawn ṭheuh te hi sit lova ti pung turin, Lalpan min duh a ni tih hre thar leh ila, a duhawm hle mai.

THUAWIH NUN: Tin, Isuan an hnenah a sawi a, “Mitirtu duhzawng tih leh, a hna thawh zawh tur hi ka chaw a ni. (Johana 4:34)
He thu Lal Isua ṭawngkam hi a van ṭhain a van pawimawh tak em! Khawvel zawng zawng a kal a chanchinṭha hril tur a a koh Pentecost Kohhran kan ni a, Lalpa hna kan thawhna kawngah hian, kan hma bak hlen lova chawlh san mai emaw, thuthlung phatsan mai emaw hi avan hlauhawm em! Min tirtu duhzawng tih leh a hna thawh zawh hi kan chaw lo ni ve rawhse.
Matthaia 7:21
" ‘Lalpa, Lalpa’ mi ti nazawng chu van ramah an lut lo vang a; ka Pa vana mi duhzawng ti tu erawh chu an lut ang..... Van rama lut tur te chu Lalpa vana mi duh zawng titu te an ni. Kohhran duh dan leh kan duh dan hi a in mil em? Kohhran duh zawng tih hi Lalpa duh zawng tih naah kan ngai em mahni ṭheuh in zawt ila.
Johana 3:5
Isuan a chhang a, “Tih tak meuhvin, tih tak meuhvin ka hrilh a che, mi tupawh tuiah leh thlarauva an pian loh chuan Pathian ramah an lut thei lo vang. Vanram luh theihna thu hi hril zel ila, tichuan Lalpa ngaiha mi fing kan lo ni ang a, mi tam tak felna a hawi kirtirtu kan lo ni ang a, tichuan vân êng ang in kan la eng dawn a ni. Daniela 12:3 Tin, a fingate chu vân êng angin an êng ang a, mi tam tak felnaa hawi kîrtîrtute chu arsi angin kumkhaw tlaitluanin an êng ang.
LALPA HIAN A THU HI ALO DUH HLE MAI, Pathian hmangaih nih kan duh chuan a thu anga kan awm a ngai tih hriain, A duh zawng ti zel turin kohhran ho te i inbuatsaih ang u.
Lalpan mal min sawm sak theuh rawh se