Thlarau Thianghlim han tih mai chuan a kawh ber chu Pathian nihna lairil a ni. Pathian chu Thlarau a ni a (Johana 4:24), Amah chu Pathian Thianghlim a ni bawk a ni (1 Petera 1:16). Pathian chu Pakhat a ni angin, Pathian Thlarau chu pakhat chauh a ni (Eph. 4:4). Thuthlung Hlui lamah chuan Pathian Thlarau tia ziak tam tak kan hmu a ni. Thlarau Thianghlim tih tawngkam tak erawh vawi thum chiah Thuthlung hlui ah kan hmu a ni. Chu tawngkam chu Bible-in a hrangin hmang mah se nihna hran nei an ni tihna a ni chuang lo a, Bible pawhin chutiang chuan nihna hran nei an ni e a ti chuang lo bawk. Thlarau Thianghlim chuan Pathian a nih thu a sawifiah zel zawk a ni (Tirhkohte 5:3,4; 1 Korinth 3:16,17). Chu Pathian Thlarau, Thlarau Thianghlim chu, Pathianin a mite thinlunga thu a sawina leh an nuna a chenna a ni a, an nun kaihruai tura a thununna a ni bawk a ni.
Thlarau Thianghlim tih tawngkam hian Pathian nihna lairil pahnih chu chiang takin a sawifiah a, chu mai niloin a nihna hrang hrang sawifiah tur pawhin he tawngkam tho hi hmanrua ber a ni tho. Khawi hmunah pawh awm, engkim hria a nihna kan sawifiah dawn chuan Thlarau a nihna kan sawi a ngai a, Pathian fel leh tha kan sawi dawn pawhin a thianghlimna kan sawi lan tho a ngai. Thuthlung Tharah chuan Thlarau Thianghlim hi ringtute tana piantharna, Pathian hnen thlenna tur a kawng pawimawh tak ni turin Pathianin hmanruaah a hmang a ni (Johana 3:5).
Thlarau Thianghlim in a tum ber leh a hnathawh ber chu, ringtute thlarau a kan awm theihna tura a chhun khahna/baptist a kan awmna hi a ni. Chu chu Thlarau Thianghlim kan dawn/pianna tihna a ni bawk a ni. Thlarau Thianghlim baptisma tih te, piang, chang, dawng, leih, pek, lo lut, lo thleng, chhung khat tihte hi sawi dan hrang, a kawh thuhmun vek ni si a ni. Bible hian heng tawngkamte hi a hman pawlh vek avangin buaina tur a awm lo, Thlarau Thianghlim baptisma sawina tawngkam a ni tih hrethiam hmasa ta ila a tha awm e. Thuthlung Hlui lamah Thlarau Thianghlim baptisma tih \awngkam tak hi kan hmu lo a. Mahse, Thlarau Thianghlim baptisma lo thleng tur leh a mite hnena a Thlarau a leih tur hrilhlawkna thu erawh kan hmu a ni. Chu hrilhlawkna chu Joela ziakah kan hmu a (Joela 2:28,29), he thu hi Pentecost ni a Thlarau Thianghlim lo thlenin Petera’n a rawn la chhuak ve leh chiah a (Tirhkohte 2:16-18), Thuthlung Hlui hrilhlawkna thlen dikna a ni tih kan hre thei a ni.
Kan Pathian thuah chuan heti hian kan hmu a, “Nimahsela amah, Thlarau dik tak chu, a lo thlen hun chuan thutak zawng zawngah chuan a hruai lut ang che u” (Johana 16:13). Thlarau Thianghlim chu thutak a min hruai lut tu a ni a, a nihna takah chuan Thlarau Thianghlim baptisma hi mihring nuna Thlarauva Pathian lo chenna hi a ni. Nun inthlakthlengna pawh kan ti thei ang. Chu Thlarau Thianghlim, Pathian nihna ze ril tak chuan mihringah hna a thawh a, mihring pawh chu chumiah chuan a inpek pumhlum a, a nun kaihruaitu ber atana a hman chuan Pathian mithmuhah thianghlim, lawmtlak a lo ni thin. Thil tha tih duhna thinlung kan neih emaw, sual kan kalsanna emaw mi tana malsawmna kan nihna te, Pathian faka kan hun kan hman thinna te hi Thlarau Thianghlim baptisma chang teh nan hman erawh a ni ngai lo. Thlarau Thianghlim baptisma changte lan chhuahna kawng tamtak zinga pakhat ni mah se, miin a chhia leh tha hriatna hmang pawhin thil \ha tih duhna thinlung chu a nei ve thei tho tih hria ila a tha awm e. Nimahsela, Thlarau in mihringa hna a thawh emaw a rah chhuah huang ah chuan kan rin lut lo ngawt theilo ang.
Thlarau Thianghlim chu thutaka min hruaitu a ni angin Pathian duh zawnga Thlarau thuhnuaia kan awmna a ni. Kan sawitak angin Thlarau Thianghlim baptisma chu nun inthlakthlengna, Pathian ram thleng tura Thuthlung Thar chhandamnaah chuan a pawimawh berte zinga mi a ni. He baptisma hi pawnlam landan tih thianghlimna mai niloin chhungril nun thianghlimna a ni. Kan taksa hi Pathian chenna (Pathian in), Thlarauva Pathian chenna a nih avangin a chenna tlak ni thei tur chuan chhungril nun a thianghlim a ngai a, Pathian nen inzawmna tha tawk tak a awm a ngai (1 Korinth 3:16,17; 6:19; 2 Korinth 6:16). Thlarau Thianghlim baptisma chang loin Pathian ram kan thlen theih dawn si loh avangin (Johana 3:5), Paula chuan Rom khua mite lehkha a thawnah pawh “Nimahsela Pathian Thlarau nangmahnia a awm tak zet chuan tisaa awm in ni lo va, Thlarauva awm in ni zawk e. Amaherawhchu tupawh Krista Thlarau nei lo chu amaha mi a ni lo.” a ti hial a ni (Rom 8:9).
Joela ziakah Pathian Jehova’n mi zawng zawng chungah a Thlarau a leih tur thu a sawi a (Joela 2:28), Johana’n Matthaia 3:11-ah Isua chu Thlaraua baptistu tur a nih thu a sawi bawk. Tin, Isua’n a zirtirte hnenah Thlarau Thianghlim lo thlen tur thu leh, a lo thlen hunah chuan thiltihtheihna an neih tur thu te, kawlkil thleng pawha a thu hretu an nih tur thu te a hrilh a ni (Tirhkohte 1:8). Tichuan zawlnei Joela lo hrilhlawk chu Pentecost niah Jerusalemah a lo thleng ta a ni (Tirhkohte 2:1-4; 2:16-21). Isua sawi angin Thlarau Thianghlim chu min thlamuantu a ni a, Thlarau Thianghlim chu amah Isua ngei a ni bawk. Tin, min awmpuia min chenchilhtu a ni a, min lam tura lokal leh tur pawh amah ngei a ni (Johana 14:16-18)). Chuvangin, amaha kan awmna chu Thlarau Thianghlim baptisma kan channa hi a ni a, ama mi kan nihna pawh a ni, a hnathawh ber pawh a ni reng a ni. Piantharna chang turin Thlarau Thianghlim kan dawn a ngai a, fa nihna kan neihna a ni bawk a, roluahtu tur kan ni bawk, chumi khaikhawmtu chu chhandamna atan a ni.
Lalpa’n malsawm rawhse.